×

اضغط هنا إن لم يقم المتصفح بتحويلك آليًا.

باللهجة الحايلية :- ( الوصف الشامل لواقع حارات حايل أيام زمان ) ( أول سفر لي أيام زمان فيها قصّة عجيبة )

بواسطة 1
باللهجة الحايلية :- ( الوصف الشامل لواقع حارات حايل أيام زمان ) ( أول سفر لي أيام زمان فيها قصّة عجيبة )
1 سبق الجميع - علي الساير:

عام 1388 هـ أول مرة اسافر بالعطلة الصيفية وجهتى للمنطقة الشرقية , جارنا سلامة الدخيل القويعي يملك سيارة لوري يكد طريق حائل الرياض وطلب منه الوالد يقبلن اسافر معه للرياض رحب ابو محمد وقال حلت البركة حتى خالد ولدى يبى معى لكن خالد يركب مع الركّاب بصندوق اللورى , وعلي يركب عندى بالغمارة عارض الوالد ورد عليه سلامة بقوله يستاهل ولدنا علي وللآول مرة يسافر ولا والله آخذ منه ريال واحد شكره الوالد ودعى له معنا شاب ووالدته أنابجنب السواق ويمينى الولد ويمينه والدته على الباب بالغمارة , وقبل غروب الشمس توكلنا على الله معنا ركّاب منهم ثلاث نساء بحاجز منفصل عن الرجال بسطة صندوق اللورى , وأرضية صندوق اللورى غنم مجلوبه للبيع بالرياض, ومعنا الشيخ عيسى المشارى , والشيخ رشيدان المغامس والشيخ عبد المحسن الروضان صلينا المغرب والأخير بصبحا الإمام الشيخ عيسى المشاري , وساعة فرغنا من الصلاة أحضر العم سلامة قدر حلقتين كبير مطبوخ به رز ولحم بعير لذيذ اللى طابخه أم محمد السلامة , قلبو العشاء على ثلاث صحون واحد للنساء , وللمعلومية كل أهل حايل اللى يكدون الرياض أيام زمان يكرمون المسافر بلذايذ الطعام لأنه { لامطاعم بطريق السفر تذكروحتى محطات البانزين } توكلنا على الله ومشينا والطريق بدون سفلت جلد وجرافه ومطبات – هذا وانا بالغمارة الله يعين اللى بسطحة الصندوق, والكفرات مشحونه هواء من ثقل الحمل والجادّه ضعيفة – واحد من الركاب أعرفه وصف لى حالهم بالصندوق يوم طبينا الرياض قال به عوارض خشب بالصندوق , المطبات الموجعه تصقع جباههنا وخشومنا ما نقدر نسولف مع بعضنا صوت السيارة وخرير الهواء يوجع الأذان وكلنا نتحرى ضربة المطب اللى يرفعنا عن السطحة من قوته واللى يتمسك بالعارضه يْسلم لكن النّيم مع المطب تصكّه عارضة الخشب – حنّا بالغمارة حاول السواق ابو محمد يشغّل الرادو بالسيارة ورفض ولد العجوز وقال أمىّ يوجعه راسه صكّ الرادو !!– حاول ابو محمد يطرد النعاس بشيلة حلوه قال لو سمحت أمّى راسها يوجعها لاتغنى !! – اللهم صبراً جميلا – يوم دخلنا نفود قرب القصيم وغرزت السيارة إنكسر القير فرحو ركاب الصندوق على طول تسدحو على رملة باردة بعد تعذيب صندوق السيارة مع الجلد وحنا بصيف وصرت أنا وسلامة الدخيل نزيح الرمل حتى يصير مجال يدخل ابو محمد على قير السيارة من تحت , شوى إلاّ وجاء حدا الركاب وطلب منى إنفهق عن السيارة وخذا الشّيول منى , قالو إسمه بندر شكر الصقيرى مهندس لكل السيارات بحايل وفرح سلامة ببندر لأنه بضيقه فكو القير من الماكينة بأقل من ساعة ونزلوه على خيشة حمايه له من الرمل يوم هبك الليل إلاّ وسيارة الرياض تجى بركّابه من الرياض وجهتها حايل مالكها صالح الحزاب جارنا بلبده بسويق البديّعة , ركب سلامة مع صالح الحزاب لحايل يصلح القير عند ورشة سالم وعثمان الحلو ورشتهم شمال عيرف بحايل – صحو الركاب من النوم على حرارة الشمس , إقترح الشيخ عيسى المشارى يفرش مكان الغنم بالصندوق - وللمعلومية جميع اللى يكدون الرياض مثبتين صناديق حديد بسياراتهم داخلها الأجبان والطحين والتمر والبطانيات مع عزبة كامله بالدلال والأباريق يتوقعون مثل هالعطال وحتى الظل حار , صوّت راعي الغنم وقال العنز تبى تموت أسالكم بالله تشترونه وتذبحونه والله مالك الغنم يخصم قيمته من كروتى المقرودة , ذبحو العنز( وللمعلومية ملاك سيارات اللورى ونصف الورى الله يخلف عليهم طريق جلد ومعوقات لاأدرى وشهو مكسبهم الله يربحنا وإياهم ) وساعة ابرد البراد تجمعنا تحت طعس رمل وحرارة الشمس تلفح الوجيه – فجأه قام حدا الركاب بكل غرور وقال أنا شرّاب اللبن وأكّال التمر وين شرابة الشاهى وأكّالة الخبز ؟ سأله الشيخ عيسى المشارى وشعندك ؟ قال نبى نتسابق نصعد هالطعس و اللى يعود قبل خوييه يدفع قيمة العنز قام حدا الركاب وقال أنا شراب الشاهى وأكّال الخبز حاول يمنعهم الشيخ عيسى ترضّوه وصمت وهو كاره قام واحد وخط خط بداية تسلق الطعس إنطلقو - شراب الشاهى صعد بسرعة وشرّاب اللبن تعثر يوم رجع شراب الشاهى وصار قريب لشراب اللبن منحدر بسرعة شقله شراب اللبن برجله ولبط على الرمل وصار الحق على شراب اللبن ضجو الركاب هذا يضحك وهذاك ينقد وتقل إن شراب اللبن ندم على عثرته وخيانته لخويّة , قال له الشيخ عيسى – عفيّيّه تغدر بخويك وحنا نشوف ما تحترمنا – وش جاك على فعلتك الشّينة ؟؟ – قمز شراب اللبن وقبل راس الشيخ عيسى وراس الشيخ رشيدان المغامس وراس الشيخ عبد المحسن الروضان وطلب من كل الحاضرين يسامحونه وسمحو له قال بندر الصقيرى قيمة العنز تروها عزيمة منى لكم رفض الشيخ عيسى قال لاوالله على أنا مسمّيها لوالدييى وأبيك يالصقيرى تنازل لي وافق الصقيرى مقتنع بعذر الشيخ بعدين أمر الشيخ عيسى على شراب اللبن يقوم ويقبل راس شراب الشاهى ويعتذر منه فعلاً نفذ امر الشيخ وصارت قهقهه وكركره ولاصار إلا الخير – الشيخ عيسى ختم الجلسة بالصلاة على نبينا محمد صل الله عليه وسلم ثم ذكر حديث نبوى عن مثل هالفسوق وحالنا بالبر وخراب سيارتنا وواقعنا حسرة وعطال سيارة , صلينا المغرب إلاّ والشباب الشقردية يقلطون اللى طبخو رز ولحم ومن رفع لقمته إلاّ ريح بانزين بالرز واللحم يعطعط وكلن عاف الرز واللحم وتوقفو الرجال أثارى [[ العنز شاربة البانزين اللى بالطّاسة اللى تحت السيارة } تحسبه ماء من العطش وكبينا اللحم والرز على شجره وقامو الشقردية من الركاب الله يبيض وجيههم وعجنو عجينة من خير العم سلامة الدخيل وصلحو خبزة نار كبيرة لذيذة جداً تعشّى الكثير وبقى زيادة يوم انصف الليل وصلت سيارة حايل الرياض مالكها عبد الله الصنيتان وركابه معه , سلامة الدخيل جايب معه قدر رز ولحم وقربتين ماء بارد وتعشينا وعوضنا الله بدل ذبيحة البانزين حامدين شاكرين ركّب القير هو والمهندس بندر الصقيرى , ومشينا وسط الليل وصلنا الرياض الضّحى سالمين , أنا ركبت تاكسى لستيشن الدمام حسب وصف الوالد قبل اسافر, ركبت سيارة الدمام وحنا خمس ركاب من الرياض إلياما وصلنا الدمام عقب العصر وأنا مثل المريض أنام وأصحى بوهه ودوخه وجسمى خمول من طريق حائل الرياض والطريق إزفلت لأول مره بحياتى اشوف طريق السفر زفلت وحسيت بالراحة لكن أشباح مطبات طريق حايل والجلد وقربعة اللوري , هذا وانا بالغمارة الله يرحم حال اللى فوق بسطحة اللورى وصلت الدمام ونا محتفظ بتلفون بيت خالي عبد الرحمن شبكة إتصالات شركة ارامكو دخلت دكان موجود به سودانى إتصلت بخالي نصف ساعة إلا خالي بنفسه يحضر , ومضت العطلة بالدمام والظهران وبقيق ورأس تنورة والخفجى , الحمد لله الأسفار هالزمان غير ماهو مثل صعوبة السفر هاك زمان زمان الصمت لامواصلات ولاإتصالات والطريق محفوف بالخطر والتييهه عن الجاّدّة وياكثر قولة ( إنّجمْ السواق ).
وإنت ياللى قريت مقالي الله يجعل السعادة ثيابك والصحة والعافية غذاؤك ولايحرمك ربي رحمته بالدّارين , والحمد لله .
علي الساير
0 | 0 | 1339
التعليقات